上一篇 : Day 10 - 12月30日 Part II : Shotover Jet 噴射快艇
下一篇 : Day 12 - 1月1日 Mount Cook Valley 冰川湖體驗日團
G. Lake Tekapo Mantra
31 December 2014 -- 今天下雨
今早6點幾就醒左, 因為皇后鎮係除夕變天啦, 三千呎大宅外面沙啦沙啦落住大雨.
阿福起身打算觀雨, 誰不知見到近窗台一排窗原來成晚冇閂到, 雨 "撇" 曬入窗台, 全部咕臣濕曬.
阿福拿拿林閂窗, 雨夾住風打落肥福手, 陣陣寒意, 原來紐西蘭 o既晨雨係咁冷架.
落大雨, 最後去 Glenorchy o既機會都冇埋啦.
心情不佳, 又凍凍地, 阿福少有咁返床 "洽" 多陣.
今日不怱忙, 雖然落雨, 但老鄧私房早餐都唔會欠缺.
當老鄧私房早餐一出, 奇蹟就發生啦.
太陽竟然出來了, 還出現彩虹添, 而且係好近咁見到, 雨亦慢慢咁由大變細, 由細變冇
呢個時候, 大家夾手夾腳, 將露台門全部打開, 一面嘆老鄧私房早餐, 一面欣賞雨後的皇后鎮.
計 Te Anau 之後, 第二次見到彩虹啦
上帝給人彩虹印記, 我要唱哈利路亞.
我把彩虹放在雲中，這就是我與地立約的記號了。
我使雲遮地的時候，會有彩虹出現在雲中...
彩虹出現在雲中，我看見了，就要記念神與地上一切有血肉的生物所立的永約。(創世記九章)
皇后鎮呢一站, 可以講得話係將成個行程帶上高潮.
10時半, 禱告交託, 開車出發. 我地出發時, 成個皇后鎮已經放晴了, 還見到有人玩滑翔降傘添.
由皇后鎮到下一站住宿 Mantra Lake Tekapo 車程3個小時, 不計休息.
開車大約半個小時, 就來到 Arrowtown. 又落雨啦
下雨中的Arrow River
河邊喜見 Lupins
二百年的街道, 古老的建築仍保持完好
路邊喜見白玫瑰
米芝蓮餐廳 SAFFRON
優雅的食肆
古老郵局
Arrow River 在很早已被發現有金砂, 曾掀起了淘金熱
好多華人被賣豬仔來作廉價勞工, 但由於言語不通及僱主苛刻, 生活十分艱難, 很多往往客死異鄉
後來金的產量越來越少, 於是很多本地人都紛紛離開了, 剩下了孤苦無依的華人, 有家歸不得, 唯有在山洞或路邊撘起簡陋的小屋, 繼續淘金的生活
現在在這裏都不難找到這些小屋的遺址, 是紐西蘭政府專門留下作旅遊及教育的用途
在Arrowtown有一個博物館, 全都將當年的事件記錄下來
Arrowtown Museum Official Site
youtube介紹
hands on history
當然, 阿福作為魔戒粉絲, 對Arrow River 也不陌生，因為第一集的其中一幕, 是講述精靈公主Alwen, 帶著哈比人Frodo, 騎著馬逃避戒靈騎士的追捕, 最後走到河上念咒語, 令河水暴漲, 將戒靈騎士沖走 (牠們是怕水的)
youtube 觀看片段
那條河就是這裏的Arrow River. 當然河水暴漲只是特技, 這裏的河水深度最多半尺.
有名的Arrow River Bridge Ride, 可踏單車或騎馬(好似Alwen咁)
可惜我地與 Arrowtown o既緣份只有1小時, 所以, 去博物館, 騎馬或踩單車全都冇時間做.
來怱怱, 去怱怱, 1小時後又要出發啦.
大約10分鐘, 就到了 Bungy Jump 發源地 Kawarau Bridge
問你憟唔憟
後生遙遙, 做乜咁睇唔開呀
笨豬快閃黨
係呢度只停留左 20分鐘左右, 就閃左啦
半個鐘後再次返回 Cromwell , 係入 Cromwell 之前, 當然再去多次 Jones Family Fruit Stall 最後掃貨啦
呢個舖頭後園有一個好大的玫瑰園, 但始終來一次, 回一次, 都無機會入去參觀, 可惜可惜.
大賊壽 : Call 零福頭, 剛剛見到隱形富豪上左車, 手上攞住好多貴重野, 身邊無保鑣 Roger ...
大賊福 : 收到, 一於跟貼佢, 去到荒山野嶺就伏佢啦, Roger ...
大賊壽 : 好, 一齊對錶 ...
個胡椒粉同鹽樽又幾 cute
嗲哋, 行快d啦
媽咪, 我永遠都係你背後o既老公
離開 Cromwell 果園區, 就開始要上山, 進入全紐西蘭最佳 o既畜牧區 MacKenizie Basin
對岸是 Wanaka 至 Cromwell 的6號公路, 而家我地走另一邊的 8 號公路
所以可以講話 Cromwell 係位於 6號及8號公路之間, 係平排架.
1小時後係 Omarama 一個小鎮稍為休息.
在 township 不遠處有一個好奇特的風化地貌 Clay Cliffs
旁邊係盛產三文魚的 Lake Benmore, 每年從海逆流而上的肥魚都來到這裏, 成為釣魚發燒友的天堂.
無奈我地只係怱怱的過客, 錯過了天堂.
以上圖片都係借網上別人的來介紹.
離開 Omarama, 大約20分鐘車程, 就來到 High Country Salmon Farm
來到呢到, 一邊天出猛太陽, 另一邊就黑雲殺到
可以免費餵魚架
從海逆流而上的三文魚, 一部份都會被人工河道引流而入圈場的魚排內, 再養肥d就供人食用.
好新鮮, 價錢只係香港三份之一, 而三文魚頭鬼佬唔食, 賤買NDZ $1一個, 咁唔識寶, 我地就豪買兩個, 攞黎煲湯補一補
好, 有斬獲, 正正正, 一於用黎除夕倒數迎新年啦
有餚無酒唔掂播, 於是到只係5分鐘車程的 Twizel 買啦, 順便買食材囉
好, 一切準備就緒, 就進入戲肉啦
由 Twizel 出發至住宿 Mantra Lake Tekapo 的沿途風光阿福唔多講, 立即去片
暫時睇住咁多先, 因為已經到啦.
東山飄雨西山晴, 黎到 Lake Tekapo , 一串陽光又一陣雨, 彩虹再現, 今日一天內, 係唔同地方, 睇見兩次彩虹, 哈利路亞
5時半就來到住宿 check-in, 職員好耐心招呼我地, 本來我地訂左一間兩房, 一間三房單位, 但因為安排唔到兩房, 所以就比左兩間同一間隔三房單位比我地, 不另收費, 發達啦!
於是開車黎到單位門口, 抬頭一看, 嘩, 咩料呀, 呢個單位點住 ....
成個單位分兩層, 地下係廚房, 客廳及一個後園, 二樓係一間主人房連獨立浴室, 兩間雙人房連1個露台, 另浴室super 大, OMG, 一人一間房呀
十郎1個人更加要上半晚訓一間, 下半晚訓一間, 或一晚訓一間...
一言難盡, 阿福又要開個專頁先可以講得曬
--> Mantra Lake Tekapo 訓你訓到嘆死你
擾攘左足足1個鐘, 先至再出發去吃晚餐.
由於係除夕, 所以食肆都爆滿, 有名的 Kohan 日本餐廳更不能再入座, 我地立即訂左1月1日的位, 否則就難有機會再吃.
搵到一間快餐式的酒吧, 就坐下, 食物水準意外地出色, 又吃得飽, 由於今晚有三文魚做宵夜, 及除夕倒數酒會, 飯後去散下步先, 順便快拍
行到太陽落山後, 就返回夢幻Apartment梳洗, 準備除夕派對.
日本人有一個民間的傳說, 話走夜路要兩個人一齊走, 透過玩接龍, 黎驅走路上o既妖魔鬼怪, 每接到一個, 就會殺死1隻.
老鄧一向早睡早起, 但今晚有除夕倒數派對, 於是佢老人家就去"洽" 一 "洽", 之後起身一齊倒數.
後來聽佢分享, 衰鬼就係呢個時間黎騷擾佢, 老鄧心無懼怕, 奉主耶穌o既名就趕走左佢啦, 問衰鬼憟唔憟.
有咁啱, 我地等緊新年黎到時, 又係玩接龍播 (唉, 夾埋幾百歲囉), 千其百怪o既接法, 好似 "飛來攘往", "油甘條" 等名字, 真係笑鬼死你, 加上大家又飲大左, 越接就越攪笑, 阿福笑到個胃跌左落d腸度呀....
一倒數完, 各位留意枱面, 找不同之處
今日號外事件 : 深夜殺戮戰場
咁大個 Apartment, 真係好開心, 倒數完, 大家都醉得八九成, 阿福因為唔飲酒, 於是就清醒d, 好想到外面觀下星, 因為呢度係天文學家嚮往o既觀星聖地.
今年除夕夜明月當空, 所以可以睇到o既星唔多, 加上好冷, 阿福於是折返, 打算出露台觀星, 點知只係打開左小小門"那", 阿福就閂都閂唔切, 只見成千上萬隻蚊不停發狂沖向玻璃門, 恐怖狀況可以拍成驚憟電影.
閉, 阿壽有冇開門呢? 阿福即刻沖入阿壽房, 佢已經醉到成隻豬仔咁, 打鑼都唔會醒, 於是檢查清楚, 好在門鎖住o既.
阿福同阿壽兩間房係同一個露架, 隔住玻璃, 見到d發狂蚊不停沖向玻璃, 毛管當堂棟起曬, 拿拿林拉埋窗簾, 冇眼睇.
阿福安心啦, 於是去沖個靚涼, 覺覺豬是也.
訓落張十級舒服o既床, 無即時熄燈, 因為想欣賞下咁靚咁夢幻o既空間, 連天花d圖案都會自己郁架...
OMG, 果d唔係圖案, 而係佈滿一天花o既蚊黎架.
應該係剛才開左一開露台門時飛入黎.
阿福當堂暈得一陣陣, 天旋地轉.
呼救無援, 點算呢?
既使將房燈閂曬都無同, 成天花都係蚊, 無可能會安心訓覺, 況且阿福呢個時候已經睡意全消.
最後決定, 同佢砌過, 唔係佢死就我亡.
卷起左一叠冇用o既A3紙, 爬高一面噴花露水整暈佢, 一面用紙拍死佢...
但其怪, 點解陸續有來呢?
OMG, 原來有個窗打開左1條線....
呢一晚, 殺戮於凌晨3時半結束, 勇者福處半死狀態, 差d與敵人同歸於盡.
上一篇 : Day 10 - 12月30日 Part II : Shotover Jet 噴射快艇
下一篇 : Day 12 - 1月1日 Mount Cook Valley 冰川湖體驗日團
--> 回頁頂
--> 到目錄
沒有留言:
張貼留言