今日間中有陽光, 黃昏有雨
今日車程, 由 Wanaka Edge Suite 出發, 至 Te Anau o既住宿 Asure Amber Court, 大約3小時, 不計休息, 基本上時間充裕.
食過老鄧私房早餐後, 精神爽利, 大家準時 9點半, 禱告交, 開車出發.
既然時間充裕, 點解要9點半出發咁早呢?
而抵達第1個休息站 Cromwell, 則需1小時左右車程, 我地打算係呢度上粮, 因為呢度有較大型的超市.
Cromwell 係位於 Otago 省的丘陵地帶, 氣候溫和, 土地肥沃, 所以造就左好多甜美多汁的水果, 成為呢一帶o既主要經濟來源, 最出名o既就係 Cherries , 還有桃李及梨, 而秋天就係甜美紐西蘭蘋果o既季節
沿途直路一條, 無乜險要地帶, 所以按時間抵達.
近公路出口, 就見到了Cromwell o既地標 : 巨型生果彫塑, 好醒目搶眼, 幾可亂真.
今日號外事件 : 回頭是岸, 收成正果
(純粹號外事件, 與佛偈冇關)
咁醒目o既地標, 當然唔會放過影相o既機會啦, 於是人人 "立" 架生...
死啦, 個相機呢, 去左邊呀 ...
哎吔, 我用毛巾包住放左入櫃桶, 唔記得擰呀...
原來尋日因為要落水, 所以為免有失, 於是就收密d, 等賊仔搵唔到, 果然, 呢招有較非常, 最後連自已都唔記得.
於是 "408" 又一野抽頭, 回歸 Wanaka.
沿途致電比 Apartment 寫字樓, 原來佢地已經收好左, 知道我地會返去攞返架.
呢件就係我前一篇, 話呢間 Apartment 有人情味就係咁解啦, 感謝天父, 我地又遇見天使啦.
"408" 唔抽頭由自可, 一抽頭, 一排雄偉o既雪山, 就係前面路上, 哈利路亞, 相信天父又一次, 用佢o既方法, 彰顯佢o既榮耀比我地睇到.
見到呢排雪山, 大家所有擔心, 勞氣, 都舒緩落黎.
"408" 施展 哼功路上飄, 神速返到住宿, 職員姐姐見到我地返來, 出黎迎接, 又跑上跑落搵同事攞返部相機比我地.
又比我地用廁所, 因為個半鐘, 大家都心急 vv 又急啦...
依依不捨又再一次同 Wanaka 告別, 我相信暫時大家都唔會講 "I will be back" 住架啦.
個半小時來回, 攞返相機, 幾大都影返夠本, 雖然只係15分鐘
咁啱有班後生仔係度玩滑板
阿福當時無落車影, 而家冧返都覺得後悔.
影完相, 就去超市入貨, 陰公豬囉, 原來 "408" 日日都便秘呀
黎到果園唔買生果, 唔係化 ...
生果買完, 貨又上齊, 係時候繼續旅程.
離開左 Jones Family Fruit Stall 後, 又開始返回山路, 沿著6號公路繼續前行, 為了搶回失去左o既時間, 我地都冇乜停站.
大約半個小時後經過皇后鎮o既外圍, 然後沿住 Lake Wakatinpu 湖岸路一直南下, 走過左 Lake Wakatinpu 開始下山, 就係一望無際o既牧場, 牛羊處處, 加上時晴時驟雨, 風景令人舒暢.
Five Rivers Cafe 位於6號公路及97號公路交界處, 係往返 Te Anau
o既必經之路.
我地來回 Te Anau 時, 都分別停左一次Five Rivers Cafe , 佢d咖啡好唔好, 阿福唔識評論, 但係 Cafe 裏面, 好多藝術家都將自己o既作品放係呢度寄賣, 作品都好有個性, 阿福實在太鐘意啦, 好想毫無保留咁同大家分享, 所以就開左一篇黎講, 而係呢版就唔多講啦.
---> 當阿 Sir 遇上5條河
點解個標題咁無厘頭? Click 入去睇下咪知道囉
休息過後再出發, 4時後就到左住宿 Asure Amber Court.
我地到左 Reception , 等左好耐先有人出黎, 又唔指示清楚個單位係邊, 要我地返頭去問, 個職員比較晦氣囉
不過, 個單位格局都唔錯, 算佢啦.
呢個係一間獨立屋黎, 有3間房, 兩間係雙人房, 一間係有三床o既3人房, 一共可似住7人.
另外有兩個連廁浴室及一個廁所, 一個客廳, 廚房及飯廳就隔開在另一邊, 前門係露台, 後門就係花園, 有個好大的晾衫架, 洗衣機, 洗碗碟機等設備一應俱全.
咁當然啦, 冇理由要十郎訓埋係3人房咁屈就架, 如果唔係, 佢實會蝕底曬比福壽雙剎架.
於是南島神勇雙飛俠又再現身, 施展斗轉星移大法, 將3人房其中一張床, 飄移左去客廳.
登登登凳, 全球最豪華o既劏房, 就係 Te Anau Asure Amber Court 啦 ~~~
劏房間完, 一切都安頓好啦, 就出發去參加5時45分的日團 Glow Worm Caves Tour 啦
沒有留言:
張貼留言